Es isch nid viu los gsy, di letschte drü Täg...
Am Sunndig het der Kudi Frei bi üs ir Chiuche prediget. I lose ihm no gärn zue.
Am Mändig het mys "Gottemeitschi" Geburtstag gha. Es isch kes Modi meh. Es isch e wunderbari jungi Frou worde. I ha grossi Fröid a ihre! Si hiuft ir "Hope and Life" Chiuche mit di Chlyne z'goume, damit ihri Eltere ungstört chöi am Gottesdienst teilnäh. Mir sy ja vor paar Wuche zäme uf Thun...
I ha mir wieder Mau e Tag Wellness yplanet. Das heisst: i bi am Morge gäge Nüni is TimeOut uf Ostermundige. Dört bin ig is Wasser go loufe. I ha nume 20 Minute möge u bi nächär zu de Düüse. Dört han ig o nid alli möge verlyde.
E Momänt unger em Wasserfall mit flach gäge beid Syte usgstreckten Arme, das het guet tah! Einigi Minute im Dampfbad, zwöi Tasse heisse Tee u no chly a di früschi Luft. Nächär i ne Würzigen Ufguss. Aschliessend ume a di früschi Luft. Am 10.50 Uhr, im Dampfbad es Salzpeeling. Nächär, unger d'Dusche, Haarwäsche u wieder Tee trinke. Nach der früsche Lüft dusse, ume
i di gröschti Souna vor Gägend, das Mal e fruchtigen Ufguss. Unger d'Dusche, ohni Mittu u grad uf e Liegistuehl. Am 20 ab Zwölfi han ig e Fuess Massage buechet. Oh, wi die guet tah het! Nach mir het sech no niemer gmäldet gha für ne Massage. I ha grad dörfe blybe liege u ha ne wunderbari Ölmassage gnosse. I bi nächär lieber Hei go liege. I dere Zyt isch o d'Sunne ume fürecho. De hani myni Heireis im Cabrio gnosse. I ha ungerwägs no by re Thai Frou Ee Portion Schweinefleisch mit Gemüse und wenig Reis ggässe. Da ig ke Gäld im Portemonnaie ha gha u nid mit Karte ha chönne zahle, het si mir gseit, i söll jetz ässe u chönni später oder am Mittwuch zahle...I bi nächär uf Ostermundige i d'Kantonalbank go Gäld uselah. uuh! isch das pyynlech gsy: i ha mi Code nümm gwüsst u ha zwöi Mal der Falsch tippet. Gott sei Dank isch är mir bym dritte Mal glych ume i Sinn cho. Das het sicher mit myne Medis z'tüeh...
I bi also mys Zmittag go zahle u ha näbedraa grad chönne Brot poschte füre Kurt. Si hei dört o feini Glace gha, so han ig eini zum Kaffi gnosse...
I bi nächär glücklech mit mym Copen obedüre Hei gfahre...
Daheime bin ig K.O. uf mys Bett gläge u bi grad ygschlafe.
Gester han ig nach em Mittag, D'Grandmaman im Heim gholt u bi mit ihre go nes Tüürli mit em Copen go mache. Si isch aube grad 30 Jahr jünger u cha yy u bym Usstyge het si de chly meh Müeh...
Mir sy zur I. go Zvieri näh u sy nächär ume uf Näbesträssli heigfahre. Daheime aacho, bin ig gly Mal yygschlafe u bi ersch erwachet wo der Kurt Hei cho isch...
Mir si du zäme mit em Copen uf Zollbrück i Schütz go Znacht ässe. I bi sooo froh, dass es mir mit em Gögge besser geit! I ha syt letscht Wuche nümme müesse! PTL!(praise The Lord!)