Am Frittig han ig Spargle gmacht. Der Kurt het s'Mamie gholt u mir hei zäme Zmittag ggässe. Bis am 15.30 hei mir Siesta gmacht. S'Mamie heigi scho lang nümm so guet gschlafe und ig ha mi vom Choche, Gögge und Ässe müesse erhole...
Z'Grosshöchstette isch Märit gsy. Der Kurt het s'Mamie Hei gstellt u ig bi i d'Apithek. Da ig nid ha wölle dä Sack voll Medis mitschleppe, han ig am Strasserand uf ihn gwartet. Är het e Termin gha mit der Kassiererin vor BPlus. I ha vor em Huus vo re Bekannte gwartet u si isch i däm Momänt grad usecho. Si het mi zum ne Schwatz bi ihre uf em Balkon yglade. Es isch für beidi e stärkende Momänt gsy u mir sy beidi gsägnet usenang. I bi nächär übere Märit gloffe u ha paar Lüttli troffe. Myni Schwiegertochter het mit ihrer beste Fründin e ThermoMix Stand gha. Si hei ganz feini Sache gmacht zum probiere. I ha grad es feins Beerimousse übercho u ha vo ihrer herrleche Züpfe Möckli i feine Dipp Sauce tünklet u se gnosse. Won ig bir Kassiererin aacho bi, bin ig mega froh gsy dörfe z'hocke. I hät nümm länger möge stah oder loue. Der Kurt het mi Hei tah u isch sälber no übere Märit u het grad dört Znacht ggässe. I bi froh gsy, Daheime dörfe z'liege.
Gester isch my Schatz am Morge im Büro gsy u het mir ghulfe s'Zmittag choche. I ha s'Gmües blanchiert gha u ha müesse go liege. Es wär mir süsch e so gange wie am Frittig won ig nach em Choche so erschöpft bi gsy, dass ig ha müesse gögge. Nach der Siesta, sy mir go Copen fahre. Der Kurt het ne müesse Wäsche u isch gärn gfahre. Mir si zu H. u R. go Zvieri näh u si no hurti Hei, dass ig ha chönne liege. Am Abe sy mir bi J.u G. zum Znacht yglade gsy. Es isch e gmüetlechen Abe gsy won ig zwüschyne ha dörfe uf em ne Stressless Sässel liege...I ha dörfe bym Heigah fahre. Es isch so schön gsy bi Vollmond z'fahre.
Das Fötteli han ig am Morgen am halbi Füfi gmacht...