Es isch es Erläbnis gsy, im ne 5*****Superior z'logiere u Gourmet z'ässe. I bi dört im Solebad, ir Bio Sauna u im Krütter und im Sole Dampfbad gsy. I di warme Soune het's mi nid gluschtet z'gah. Es isch schön gsy mit em ne Teil vor Familie, mit Verwandte us Dütschland u mit Fründe vo Kurts Schwöschter ihre Geburtstag z'fyyre. Am Abe het's ganz feins Ässe ggäh. Am Zischtig isch e Chuchiparty gsy. Das heisst: jede Gang isch grad früsch gmacht gsy, hesch sälber ir Chuchi zuegluegt, wie si's mache u hesch es dört gholt. Wy u Champagner hesch o chönne ir Chuchi Glaswys probiere oder wi mir, am Tisch bstelle. Lüt wo gärn viel ässe sy uf ihri Rächnig cho. Hesch chönne ässe bis Dir d'Ohre gwaggelet hei. I ha nach einige Vorspyse u re Suppe scho fasch gnue gha. S'Dessert isch o aamächelig u fein gsy. Am Morge het's es ungloublechs Buffet gha. O da hesch a Discretion chönne yneliege. I ha vor allem früschi Ananas, Orange , Grapefruits u Ärdbeeri ggässe.
Uf em Heiwäg hei mir am Strasserand bym ne Stand früschi süessi Ärdbeeri u Spargle poschtet.
Myni Lunge isch geng no greizt. Respektiv tuet's mir bym Abliege geng no dört weh wo si ynegstoche hei für d'Flüssigkeit abz'lah wo sech zwüsche Lunge u Lungefäll aagsammlet het gha. Nach der Ärztin töne myni Symptom nach Närvschmärz. Drum het si mir es Mittu verschrybe wo sött d'Wyterleitig vom Schmärz a mys Hirni störe. Wenn's würkt, de muess ig nid no meh Morphium näh. I ha das scho ir Apithek chönne bstelle. D'Schmärze ir Lunge chöme vo de Metastase wo drynne si. I gspüre, es isch öppis gange...