I hoffe, i mög de...Gester isch bi der Punktion alles guet gange bis zum Useziieh vom Schluuch wo 1,25 Litter Flüssigkeit useglah het wo sech zwüsche Lunge u Lungefäll aagsammlet het gha. Ja, i bi fasch i d'Schnitz gheit u ha mega Schmärze gha. Dä Erguss isch halt scho syt em Oktober 2020 sichtbar gsy u d'Lunge het sech wieder müesse entfalte u das tuet wehh.
Vor 21 Jahr hei mir üs in Griecheland i de Ferie kenneglernt. Üse M@i isch denn vieri gsy u het syni chly meh als drü jährigi Fründin zum Spaghettiässe aagschleppt gha. Ihre ältischt Brüetsch u üse Stephan hei sech gly gfunde u i de kommende Griechelandferie sövu Seich zäme gmacht, dass mir als ganzi Familiene fasch si Hei gschickt worde...Si sy aube doch ysichtig gsy, hei zueggäh, dass si der Seich gmacht hei u sech entschuldiget. Es sy nid bösi Buebestreich gsy...zum Byspiel hei si mehreri Delfin Ghüder (siehe Bild) i der Nacht uf enes Huusdach ufe gschleipft. Wo du Shampoo i d'Wasserrutschi gläärt isch worde sy mir froh gsy sy si nid derbi gsy...Ja, jetz sy si gstandni Manne. Der Stephan mit drüü Buebe wo halt mängisch o Flousen im Kopf hei... u äbe der G. wo ne super Jugendarbeit leitet u hüt hüratet. Das macht üs als Eltere glücklech u stolz!
Am Namittag göh mir de a ne Geburifest vo de Schwiegereltere vo üsem Jüngste. O die kenne mir no vo üsere Jugendzyt här...