Oh, es isch schön gsy am Thunersee. Mir hei alt Bekannti troffe u fein ggässe. Am Sunndig hei mir d'Mamie gholt u sy uf Oberhünige i d'Gemeinde für Christus. Es isch schön gsy mit der Evangelischen Allianz Konolfinge zäme Gottesdienst z'fyyre. Im Ougust wärde d'Gemeinde für Christus, s'Evangelische Gmeinschaftswärk u d'BewegigPlus zäme e Wuche lang a den Abete Talks, e Kinderchilbi, e Seniore Namittag, e Jugend und e Frouen Event im ne Zält dürefüehre. Meh derzue unger: www.content.gfc.ch Nach em Gottesdienscht het's e Suppe ggäh u nächär megafeini Desserts zum Kaffee. D'Mamie het sech grad sächzg Jahr zrügg versetzt gfüehlt wo si im Brüederverein aube nach em Gottesdienst Suppe u Chüeche übercho het. Es isch aber nümm z'verglyyche mit denn. Es isch e ryyse Veränderig gscheh. Denn hei d'Chilene no gäge enang prediget u Hüt spanne si zäme. Halleluja!
Im Momänt han ig fasch ke Tag won ig nid muess erbräche...I hoffe gly z'vernäh wiso. I bi am Nami uf Burgdorf es CT mit Kontrastmittel go mache.
Eigetlech han ig mit der Ärztin abgmacht, dass mir am nächste Zischtig zäme telefoniere. I ha ihre aber Hüt es Mail gschrybe si söll mir doch di sichtbare Veränderige per Mail düregäh. Myni Lunge tuet mir uf der linke Syte weh u
u s'Stägeloufe wird o geng wi müehsamer. I chume e sooo i s'Chiiche, dass es e ke Gattig het... u sobald ig mi chly aastränge, muess ig go gögge...
Morn chan ig nid i d'Livenet Pouse. I muess uf di 09.15 Uhr mit em Mamie zum Zahnarzt. Es isch ihre en Egge vom ne Zahn abbroche u drum müesse mir das go la abschlyyfe.