Der Pesche isch Geschter ume is Bärau. Es isch e gueti Zyt gsy u doch bin ig Müed worde.
Hüt am Morge bin ig umen einisch is TimeOut uf Ostermundige. Es isch rüehrend gsy, wievieli mi vermisst hei. Im Bad hin u här loufe, das tuet mir geng guet. Nächär a d'Düse u sogar d'Hüehnerleitere uf is Sprudubad. Im Dampfbad han ig's nid so lang am Stücke usghalte u z'letscht, nach em Tee trinke, i di grossi Ussesauna. Dört isch d'V. cho ne Ufguss Zeremonie mache. Die duuret öppe 12 Minute u besteit us drüü Duftrichtige. si tuet z'ersch di heisse Lavasteine mit Wasser bfüechte, dört wo si nächär d'Yyskugle druf tuet u die mit der Schöpfkelle verdrückt. Di tuet nächär mit em ne Badtuech wädle u verteilt e so der Duft u der Dampf. Hüt het si z'erscht grüeni Mandarine, nächär e Pfäffer ähnleche Duft us em ne afrikanische Harz u schlussändlech, Jasminduft mit Orange gmischt. Es isch beläbend gsy. I bi hurti no go poschte u bi schnäll Hei go choche. Es het no ne feini Hackfleischsauce gha vo Gester. I ha Bio Teigware derzue gmacht und e Früehligssalat. Mir hei z'dritte höch alles furtggässe. Es isch haut fein gsy!