Die Wuchen isch im Nu düre gsy. Am Mittwuchmorge bin ig ir Livenet Pouse gsy. Es isch scho geng ermuetigend. Nach em Zmittag sy der Pesche un ig ume uf Lützuflüeh go bade. Ja, das het guet tah. Nachdäm ig no z'Burgdorf zur C. bi, sy mir samt em Pesche i d'Chlygruppe. Si het die Wuche by M@i u Sabrina stattgfunde. Si hei würklech e wunderschön u grossi Wohnig mit Galerie. Am Donnstig het der Pesche ume zum R. uf Zollbrügg dörfe. I ha am Namittag mit der Palliativ Ärztin e Termin gha. Si het mir empfohle bim Huusarzt es paar Bluetwärte u vor allem e Nierewärt z'bestimme für i de nächste zwo Wuche es CT mit Kontrastmittu la z'mache. I ha ja geng meh Müeh Stäge z'loufe wüu der Schnuuf mir auben uus geit. De weiss ig de o chly meh won ig stah u wohär die Schmärze ar linke Lunge sy. Die Wuche han ig ume meh Müeh mit em Erbräche...Süsch geit's mir fei guet.
Geschter han ig äbe i d'Kalchofepraxis müesse go Bluet gäh. Si het beidi Röhrli mit em ne Stupf i Finger chönne fülle. I ha Artischocke gkochet u ha d'Grandmaman zum Zmittag häregholt. Si tuet doch so gärn a de Blätter umegnage. Am Namittag het der Pesche üs zwöi i d'Waldhüsere zum Zvieri yglade. Es isch guet u wäg der Kälti dusse no grad usz'halte gsy. Der H. u d'R. sy cho Znacht ässe. Am Achti si mir alli zäme uf Zollbrügg a Bier&Food Festival. Dört het der David Jutzi mit eire vo syne Bands "Airline" gspielt. Si hei das hammermässig gmacht. Mir gfallt dä Südstaaterock!