I bi also Gester zum Huusarzt u dä het mit em Ultraschall gluegt. Vorhär het er myni Suurstoff Sättigung im Bluet prüeft u die isch uf 99 gsy. Mit em Schall het's myni Befürchtig bestätiget, dass es bym linke Lungeflügu meh Wasser het. Das zeigt, dass myni linki Lunge nümm elastisch isch u der Erguss im Lungefäll grösser isch worde. Dä drückt mir zwüschyne uf e Mage, dass es mir schlächt wird...Der Dr. het mir usgrächnet wieviel Morphin Tröpfli ig söll näh, damit es öppis nützt gäg di Schmärze. Er het mir empfohle, mi mit der Schmärzärztin i Verbindig z'setze. Das han ig am Nami versuecht. Ihri Sekretärin het mir gseit, si sygi bis Mitti Mai wäg. Ihri Verträttig i mym Fall sygi d'Palliativ Ärztin. U die isch ja bis am 17.04.22 o nid ume. I ha du gmeint, der Wirbusüüle Spezialist heig mi o scho gseh. Ja, dä isch i de Ferie...Na super!
Zum Glück han ig mit der M. abgmacht, dass si mir chunnt cho ne Lymphdrainage mache. Die het mir sehr guet tah. I ha am Abe d'C. gfragt wi's ihre göng. I ha i de letschte drüü Wuche zwöi Mal nid zu ihre i d'Osteopathie chönne wüu si nid zwäg isch gsy. Si het mi gfragt, öb ig e Termin wöll und het mi hüt am Namittag zwüschyne gno. I bi ihre sooo dankbar. Es het mir würklech glugget, mit de Schmärze.
Lymphdrainage u Osteopathie ziehn ig a de Morphin Tröpfli vor!
Hüt am Mittag hei mir der Geburtstag vor Jael gfyyret. Si isch am Mändig am 04.04. Sächsi worde. D'Grandmaman isch o derzue abgholt worde. Si liebt Poulet-Flügeli. Settigi git's fasch nie im Altersheim u si tuet doch e so gärn a de Knoche gnagge. D'D. het sich hüt am Morge gmäldet, si chömm mi hüt Nami am Eis oder Zwöi cho bsueche. Mir hei üs leider verpasst, da si erscht am 15.07 Uhr in Bigle aacho isch. I ha am 15.30 Uhr mi Osteopathie Termin gha u mir sy halt am Drüü scho losgfahre, da der Kurt i dere Zyt in Burgdorf isch go ne Maschine hole. Mir sy nächär no i Jakob Markt go poscht u aaschliessend der Pesche im Bärou go hole. Dä isch ume eis bi üs i de Ferie. Hinecht luegt är der Play-Off Mach vo Zug gäge Davos. I bi gspannt, wär gwinnt. Der Pesche isch für Zug u der Kurt für Davos...
I gah jetz is Bett.