Syt Vorgester tuet's mir byr Lunge meh weh...I bi am Mändig gsy go bade. Scho am Abe han ig meh weh gha. Am Zischtig han ig mi Daheime still gha. Gester bin ig am Morge i d'Livenet Pouse. I ha ke gueti Verbindig gha, ha aber alles mitübercho. Am Mittag han ig mys Gottemeitschi (ungerdessi, e wunderschöni jungi Frou) byr Schuel abgholt. Nachdäm mir bi mir Daheime Spaghetti Bolognese u Salat hei ggässe bin ig es Momäntli go liege. Es tuet mir bym Liege no meh weh...I ha du entschiede, dass mir mit em Cabrio es Fährtli gö go mache. Mir sy uf Einige, dä Ort go luege wo der M@i u d'Sabrina ghürate hei. Es isch scho ne wunderschöni Gägend. Mir sy no z'Thun uf e Mühliplatz öppis go trinke u sy aaschliessend i Fontis Büecherlade. I ha d'J. nächär Hei gfahre. Es isch e schöne Nami gsy und es het mi würklech guet abglänkt. I bi Daheime ume go liege u bi grad ygschlafe. Es het zum Znacht no ne Räschte feini Chabissuppe gha wo der M@i am Mändig gmacht het gha. Die han ig mit mym Schatz zäme ggässe.
Am Achti het sech üsi Stube gfüllt. Mir hei Chlygruppe gha. Das isch e gueti Sach! Mir tüeh aube zäme über ne vergangni Predig rede u tuuschen üs drüber us. Dä Part isch geng spannend, we mir üsi alltägleche Fröiden u Leide teile, enang ermuetige u zäme für persönlechi Aaliege bätte. E wichtige Teil vom Abe isch aaschliessend zäme öppis trinke u knabbere.
Ir Nacht han ig wäg de Schmärze z'ersch Müeh gha mit Yschlafe u nächär hei si mi paar Mal gweckt.
I ha hüt am Morge is Spital aaglütte. D'Palliativ Ärztin isch bis am 17.4. nid ume. Drum han ig vori am Huusarzt aaglütte. I cha no am 11.45 Uhr zu ihm.