Vorgester het der Stephan Maag – PREACHER ir BewegungPlus in Konolfingen gredt. Es isch mega inspirierend gsy. Füf Pünkt vor Predig sy mir blybe:
- Der Dume gäg ufe: Jesus wott uf em Thron vom mym Inneläbe sy. Är wott z'säge ha u wott mi füehre.
- Der Zeigfinger: dä seit mir gang u verzell allne wyter, was Jesus tah het u Hüt no tuet. Bhalt's nid für Di.
- Der Mittelfinger: D'Kirche söll der Mittupunkt vo Beziehige sy. Gott het mit em Mönsch vo Afang aa Beziehig wöllle. Är sälber isch Beziehig vo Vater-Suhn u Geist.
- Der Ringfinger: Der Heilig-Geist bestätigt mir, dass ig e Tochter Gottes bi.
- Der Chlyfinger: My Gott würkt i de Schwache mächtig. Syni Gnad längt mir!
D'Sabrina u der M@i sy cho Zmittag ässe. Der Y. isch o hurti uf nes Bier cho. Der Stephan, d'Flavia, der Aiden u der Even sy cho s'Kaffi u Chai - Latte näh. Nach ere kurze Siesta sy der A. u syni Muetter cho s'Zvieri näh. Si het wieder e so ne feine Bläch-Chueche gmacht. Dä het der Gschmack vo feine Nussgipfu gha. Am Füfi sy d'E. u der H.R. cho Znacht ässe. Ihren Änkel het am Siebni ir Espace Halle e Mach gha. Es isch geng spannend zäme usz'tuusche.
Gester bin ig ume i s'Timeout. Im Bad isch kei einzigi Düse gange. I bi halt eifach im warme Salzwasser hin u här gloffe. Ir grosse Souna sy mir zwänzgi gsy. Es isch e Sounameister gsy wo der Ufguss zum ne wunderschöne Event mit Musigg u voll im Takt mit de Tüecher gwädlet isch worde. Drüü Düft sy's gsy: Bluetorange - Münze u zum Schluss no Himmalaya Zedere. S'Ganze het zwölf Minute duuret.
Zum Zmittag bin ig froh gsy um das feine Bärlouch Risotto vo Thür's. Mir hei no Nüssler derzue ggässe.
Hüt han ig zwöi Gratinforme Louchgratin u Ofehärdöpfu gmacht. Der M. het no am T. dörfe säge, si chönni o no cho. Das het mi gfröit, dass es allne gmundet het. I ha no ne Portion für e Kurt chönne rette...die wär ohni wytteres o ggässe worde...I bi froh gsy um d'Hilf vom M@i. Är het mir ir Znüni Pouse, der Louch gschnitte u d'Härdöpfu grüschtet...E so macht Choche Fröid, wenn alli schmatze u z'friede sy...