Am Abe het my Maa e Sitzig gha. Won är Hei cho isch, hei mir es Bettmümfeli gno. I ha kurz druf abe müesse springe go d'WC Schüssle umarme... Wenn hört das ändlech uuf?
Hüt am Morge bin ig uf Ostermundige is Timeout. Dört bin ig ume ne Halb Stund im warme Wasser hin u här gloffe. Chuum im Bad, het mi e Frou wo immer am ne Frittig dört isch aagsproche. Si heig mi letscht Jahr i re Fernsehsändig gseh u
sech gfragt, öb si mi ächt jemals wieder einisch gsäch. Si het gfunde, i machi s'Richtige u het mi ermuetiget "nume wyter e so". Kurz druf abe isch mir eini vo de Masseurinne begägnet u het mega Fröid gha. O si het mir usdrückt, dass si, wo si mi s'letsche Mal massiert het dänkt het si gsäch mi äuä nächär nie meh.
I gsäch ja besser us als denn...
Am Mittag hei mir üs grad im Esswerk6 in Niederhünige troffe. D'Sarah, der M@i, d'Sabrina u der Kurt und ig hei zäme dört s'Zmittag gässe. Es het z'erscht, e feini Sellerie - Kerble Suppe ggäh und es Salätli. Zum Houptgang het's es Schwynscotelette a re feine Pfifferlingsauce mit Ofegmües und es Dinkelsotto. Zum Dessert, het's Schoggimousse mit Hasunuss-Wyybeeri Crumble u Rahm schuum druffe ggäh. Nach em ne Esspresso sy mir gäge Hei zue. I ha gly druf Bsuech gha vor V. Es isch es gmüetlechs, ateilnähmends Ploudere gsy mit ihre.
Vory het mir d'Lunge richtig weh tah. I ha füf Morphium Tröpfli gno u gah ume go liege.