S'letschte Wuchenändi isch ruhiger gsy als s'Vordere.
Am Frittigabe sy mir bi üsne Nachbare zum Znacht yglade gsy. Mir sy würklech dankbar u glücklech hei mir so gäbigi Nachbare. Es het guet tah ume eis zäme z'ploudere u enang s'Nöischte wyter z'gäh. Möge si üs no lang erhalte blybe.
Am Samstig hei mir der ganz Tag der Aiden u der Even goumet. Am Nami hei mir Bsuech gha vom M. mit em chlyne Emanuel u zwöine Eritreerinne. Si hei Injera bracht u no nes Gmües derzue. D'Buebe hei ganz schön zäme gspielt. Der Mäneler isch o scho füf e Haub Jährig. Es isch krass wi di Zyt schnäll vergeit!
Mir sy am Abe knüttu müed gsy u sy früeh is Bett.
Am Sunndig sy mir nach em Gottesdienst z'Konolfinge, mit em Copen go usfahre. Mir hei z'Oberbütschel s'Zmittag ggässe. Es isch zwar nid ganz klari Sicht gsy aber me het guet chönne dusse höckle zum Ässe.
I ha gester am Morge das Fötteli gmacht. Der Mond isch so schön gsy. Das han ig müesse yfaah. I bi am Achti scho im Timeout gsy. Won ig am zwänzg ab Zähni i di grossi Sauna ha wölle, isch e Zedu ar Tür ghanget: "ausser Betrieb". Die Wo am meischte gfluechet het isch d'Souna meischtere gsy wo nid isch informiert worde. Si het mir gwüss no Leid tah...I bi du mit em offene Dach Hei gfahre.
Nach em Zmittag han ig der Ydruck gha, i söll a re Fründin aalütte u si go bsueche. Es isch s'Richtige gsy. Si het grad e schwierigi Zyt u mi Bsuech het ihre guet tah. Mir sy no kurz zäme mit em Copen go nes Usfährtli mache wo si mega gnosse het.
I bi froh, han ig nümme müesse gögge.