Am Sunndig am Abe hätte si sölle bi üs yträffe. E jungi Muetter mit zwöi Kinder us der Ukraine. D’I. u der M. si se uf Prag go hole. Si hei di erschti Nacht alli bi ihne übernachtet. Dass heisst, d'Schwöschter vor I. mit zwöi Buebe u ihri jungi Schwägerin mit zwöi Modis. Gester sy si der ganz Tag mit ihne bym Migrationsamt gsy. I ha du der I. aaglütte u byychtet, dass ig nid zwäg syg. Si het sowiso e besseri Lösig gfunde nämlech, dass di Jungi Muetter mit de Modis zwöi Strasse wäg vo ihne zu re Koptische Familie göh go schlafe u düre Tag mit ihre chöi sy. Vo hie uus wär’s kompliziert gsy, mit em Transport, jede Tag. I hoffe, dass es gly vom Staat här e gueti Lösig git mit der private Ungerbringig. I re Stund machen ig e PCR Test u bi gspannt was da usechunnt. I ha vom Sunndig aa bis Gester am Nami alles kötzlet won ig ygnoh ha u ha sicher o Fieber gha u Kopfweh. Es geit mir besser u doch füehlen ig mi wi ne wäschhudu, wien ig drüü Wuche chrank wär gsy...