Am haubi Zähni hei mir (der Kurt u ig) ihn abgholt, der Pesche im Bärou. Mir sy zäme go bade, is Solbad uf Lützuflüeh. E ganzi Stund hei mir's fasch nume mir drüü im warme Wasser, a der Sunne gnosse.
Uf em Heiwäg hei mir der Even bi syre Tante abgholt. Syni Eltere hei zur Fröid vo ganz Vielne, ihre Käller gruumt. Am Abe isch eigetlech nüt meh ume gsy. Si hei
eifach das wo si nümme hei wölle, a Strasserand gleit. Innert Minute hei Lüt us em Talacker u o süsch settigi wo kurz aaghalte hei, di War dankbar mitgnoh.
Nach em Ässe het der Kurt si ProAce am M. übergäh. Dä isch mit der I. uf Prag gfahre go d'Schwöschter vor I. u deren ihri Schwägere hole. Ihri Manne kämpfe Daheime um ihres Hab u Guet u ums ÜberLäbe. Möge si uf em Wäg i d'Schwyz u o die i der Ukraine b'hüetet sy.
Der Stephan u d'Flavia hei du mit üs hie s'Znacht ggässe. Si hei de der Pesche ume Hei tah. I bi froh u kaputt, scho vor em Achti is Bett. Gäg di Zwöi bin ig erwachet u ha nümm chönne yschlafe. I bi du i d'Chuchi go ne Träumer Tee brüeije. I ha ne äuä z'schnäll trunke u ha ne grad müesse gögge. I bi o süsch fei e chly heikel, we's mi am Halszäpfli chutzelet, de lüpft's mi no schnäll. I bi ir Nacht no zwöi Mal erwachet u ha my Tagesvärs wytergleitet u eis vo de Lieder wo ungerdessi cho si. Hüt am Morge hei mir fasch bis am Achti usgschlafe. Der Kurt isch uf Konolfinge i Gottesdienscht. Mir wär's z'viel worde nach em GD no dört z'ässe. Är isch no nid Hei cho...I ha am Burgdorfer BPlus-Gottesdienscht per Lifestream teilgnoh. Das isch ganz nach mym Gusto gsy: was mir am gringschte vo Syne Gschöpf tüeh, das tüeh mir IHM.