Geschter am Morge ir Livenet Pouse bin ig ermuetiget worde myni Beziehig zu Jesus z'vertöife. Ja, i wott ganz nach a Sym Härz sy wi die drüü Apostle wo geng i Syre Nächi si gsy. I wünsche mir, positiv aasteckend z'sy mit mym Läbe. I wott läbe! Geschter am Namittag bin ig bym Optiker gsy. I ha ir letschte Zyt hüfig meh Müeh gha z'läse. Es het sech bestätiget. Es bruucht tatsächlech stärcheri Gläser. I finde, wenn schon, denn schon! Di nöii Brülle gfallt mir mega!
Am Abe isch es ir Chlygruppe um üsi Gabe gange. I wott nid eifach läbe, sondern i myre Bestimmig inne, no meh mit dene Gabe won ig übercho ha. Was sy das für Gabe? Hie, en Uswahl…d’Liste isch nid komplet…
- I bi Gastfründlech
- I bi durch und durch Muetter, nid nume für myni Kids
- Ar Syte vo mym Schatz u mit syre Hilf chan ig myni Gabe no wyterentwickle
- I gseh mi als Brüggebouerin zwüsche Mönsche wo's nid glych gseh oder wo's nümm zäme gseh...
- Mit myre Stimm chan ig Härze berüehre
- I cha dranneblybe, gibe nid so schnäll uf
(I weiss scho, i ha o myni Schwächine, aber hie geit's um Gabe...)
Vory si der Kurt u ig vom Gspräch zrüggcho mit der Ärztin wo mir grad als Erschts gseit het i mym Kopf syg nüt wo nid häreghöri. Das bestärkt mi i mym Vorsatz z'läbe. I weiss, das tönt viellecht komisch aber es isch für mi wi wenn ig no chly Galgefrischt übercho ha. Klar weiss ig, dass ig wirde stärbe aber i wott die Zyt wo mir blybt voll uskoste u voll läbe. So wi der Luther gseit het: o wenn ig wüssti, dass Morn d'Wält ungergeit, würd ig Hüt e Boum setze.