Am Samstig hei mir tatsächlech nüt los gha. Es het sech komisch aagfüehlt...
Am Sunndig sy mir i Gottesdienst i d'BewegungPlus Konolfingen. Mi Näffe het d'Predig gha. Är studiert Theologie am ISTL u macht's scho ganz guet. Syni Predigte si geng sehr Läbensnah. I losen ihm gärn zue.
Es isch schön gsy, aaschliessend no im KaffeePlusTräff z'höckle u bym Ustuusch es Espresso z'trinke.
D'E. het am Samstig Geburtstag gha u het üs u paar Verwandti u Fründe am Sunndig zum ne feine Zmittag bi ihne yglade. Es isch so gmüetlech gsy, dass mir bis am späte Nami si blybe hocke. Won ig Daheime uf mys ungere Bett gläge bi, da het's mir der ganz Brustkorb zämezoge. I ha dört grad wi ne Krampf gha. I bi doch der ganz Tag z'lang ghocket!
Gester het mir d'C. byr Osteopathische Behandlig erklärt, dass der Erguss won ig bym Lungefäll ha e Verdräiig vom ganze Brustkorb erzügi. Si het verschiedeni
vo däm verursachte Blockade chönne löse. Solang dä Erguss isch, wird's immer wieder Blockadene gäh. Am Bei het si mir d'Bluetgfäss glockeret wo krampfet hei.
Hüt am Nami han ig es MRI vom Kopf gha. I ha de am Donnstig e Termin bi der
Ärztin für Palliativi Pfleg. Si wird mit mir di Ufnahme bespräche. I wirde ihre o mys Bei zeige wo geng no weh tuet.
Der Kurt u ig fahre jetz de grad uf Lützuflüeh is Solbad. Das wird sicher beidne guet tue!