Für die wo jetz nümm wüsse, was choche...chasch bi mir nachefrage was myni Manne so Guets kochet hei...
I tue jetz eifach schrybe, wenn öppis anders isch als "der normal Alltag".
Die Wuche isch am Mittwuch speziell gsy, dass d'Mamie am Elfi isch im Heim abgholt worde u mit em Kurt zur G. het chönne i d'Therapie gah. Das het ihre guet tah. Si isch nächär cho Zmittag ässe. Raclette het's gäh mit sälber ygleite Zucchettis vor M., im Öl ygleiti Tomate vor R. u vom M@i kochti Zibele im Rotwy.
Am Donnstigabe hei der Kurt u ig üsi jüngscht Änkel es momäntli lang goumet.
Geschter hei mir scho zum Znüni liebe Bsuech gha mit Gipfelis.
I ha scho syt em ne Zyttli Zahnweh trotz de starche Schmärzmittel. I ha bym Zahnarzt aaglütte u myni Lag erklärt. I ha chönne wähle zwüsche Hüt am 12i u am Zischtig am 15.30 Uhr. I ha du gseit, es göngi bis am Zischtig. Da hei si mir tatsächlech zrüggglütte u mir e Termin für Hüt am Nami am 14.30 Uhr aabotte. Das isch vom Taxi här besser gsy. My Schatz isch mit mir uf Thun gfahre. Ja, i ha myni Zahnärztin dört. Si het es Röntge gmacht u het mir du bi eim Zahn abgschliffe won ig chly z'viel druf bysse. Si het no öppis druf tah wo macht, dass d'Zähn nüm so greizt sy u het mir gseit i söll sofort aalütte, we's mir ume wehtüeg. Es chönni sy, dass ei Zahnnärv am särble syg u de müess me de e Wurzubehandlig mache...i hoffe, es heig sech eifach still! I bi mega froh, isch es nid meh gsy!
Am Abe sy mir mit R. u H. uf Worb i Löie go Znacht ässe. Am Tisch näbedraa sy Bekannti am Geburtstag fyyre gsy u scho bau am Hei gah. Ja, üsi Wält isch scho chly! Mir sy o zu üs Hei go s'Kaffi näh. De han ig derzue chönne liege.