Am letschte Samstig sy my Schatz u ig mit üsem Jüngschte Suhn, der M@i u syni Frou d'Sabrina zäme ihres Hochzytsgschänk go yzieh. Mir sy zäme i Alpenblick uf Wilderswil go Gourmet ässe. Es isch einsame Spitze gsy!
Am Sunndig sy mir i Gottesdienst uf Konolfingen i d'BewegungPlus.
Geschter sy mir nach em Fyrabe no zu G. u R. öppis go liefere u der Kurt het's grad mit em R. montiert. Es sy langjährigi Fründe u da hei mir enang fei e chly z'verzelle gha.
Hüt am Namittag het mi d'Flavia uf Burgdorf gfahre. Si lernt no Outofahre, cha's aber scho fei e chly. Vo mir uus cha si gly a d'Prüefig. Si het mi usglade u der Stephan isch nächär ume näb ihre ghocket für Hei z'fahre. I ha nes Gspräch gha mit der Palliativ Ärztin. Mir hei zäme verschiedenes aagluegt u sy zum Schluss cho, dass es MRI vom Kopf Sinn macht. Si het mi aagmäudet. I wirde de ufbotte u wirde nächär ume mit ihre öppis abmache für s'Wyttere z'bespräche. I ha myni Patiänteverfüegig nöi gschrybe. I ha das Mal di chly usfüehrlecheri usgfüllt. D'Ärztin tuet de nächär luege, dass si mit em Pflegeplan überystimmt.
I bi nachdäm ig vom P. abgholt worde bi u mit der R. u ihm zäme öppis trunke u nes feins Dessert ggässe ha, bi ihne blybe bis der Kurt cho isch. Mir sy zäme i d'Oberstadt wo är mi usglade het. I ha i d'Osteopathie dörfe. Es het ume guet tah!
Der Kurt u ig sy nächär uf Lützelflüeh is Solbad go bade. Jetz bin ig grad Bettryyf.