Am Vieri han ig der Termin gha. My Schatz isch mitcho. Der Wirbusüülespezialist u d'Schmärzärztin sy da gsy. Der Spezialist het üs a Hand vo de Bilder vom MRI der Närvestrang vom Hirni bis zum Steissbei zeigt. Es drückt niene irgendöppis druf! Halleluja!
I ha gseit, i syg ir Osteopathie gsy u
da het d'Schmärzärztin gmeint: "de het si das chönne löse, zu wäm göht Dir?"
-"i gah is Osteoteam zur C."
- "ah, i ha ghört die sygi guet!"
Ja, i söll nume wyter zu ihre gah. Was mir jetz no weh tuet isch die Muskelzerrig im Underschänkel. I dänke es cha o no sy, dass d'Ystellig vo mym Bett myre Überbewegleche Wirbusüüle nid guet tah het: I ha der Kopfteil ufgstellt gha u d'Bei o. 'Bi also wi ne Banane i däm Bett gläge u ha derzue no der Laptop uf em Buuch gha zum Schrybe. Der Kurt het mi druf ufmerksam gmacht u d'Schmärze sy scho schwächer gsy, sobald ig nümme Banane gsy bi. Ja, myni Überbeweglechkeit isch mir scho öppedie zum Verhängnis worde u doch o zum Säge. I cha mi nach wie vor no rächt guet bewege, obwohl ig so viel Schruben im Rügge ha. Ja, uf der Bilder gseht me scho di Löcher vo de Metastase i de Wirble. Die gspüren ig scho u o der Erguss bir Lunge isch sichtbar. Das wirden ig nächst Wuche mit der Ärztin für Palliativpfleg aaluege. Mir wärde o zäme myni Patiänteverfüegig u d'Pflegeplanig aktualisiere. I ha ja einigi Medikamänte nümm u anderi neu...I füehle mi im Spital Emmental in Burgdorf guet ufghobe. U weiss, dass schlussändlech EINE drüber steit!