Am letschte Frittig han ig no ne agnähmi Fuesspfleg dörfe gniesse. D'R. isch denn zu mir Hei cho. Das tuet aube so guet!
Am Sunndig isch es schön gsy ume eis i Gottsdienscht chönne z'gah. Myni Gschwüschterti hei o Fröid gha, mi ume eis Live z'geh. Es het mir aber scho Müeh gmacht, di ganz Zyt müesse di blödi Masken anne z'ha...I bi de froh, we mir se gly Mal dörfe wäg lah. Der M@i isch o Hei cho Zmittag ässe u d'Sabrina isch du nach em Schaffe o da häre cho. Es isch spannend gsy mit ihne u mit der P. z'diskutiere. Si sy du grad zum Znacht da blybe. D'P. het vor em Heifahre, mit der Sabrina zäme, d'M. vom Bahnhof abgholt.
Gester het d'Sarah vor em Zmittag, d'Mamie da häre gholt. Si het o Fröid gha d'M. ume eis z'gseh. Mir hei e gmüetleche Nami gha. D'Mamie het üs aber Leid tah. Si het syt em ne Sturz vor drüü Wuche so dermasse Rüggeweh, dass si's nid lang ir glyche Position mag verlyde. Es het zum Glück grad öpper bir G. in Burgdorf abgseit. So hei mir chönne mit ihre uf di 17.15 Uhr is Osteoteam fahre. I bi gspannt was am Donnstig usechunnt. Si cha denn i d'Centerpraxis go röntge.
I gah ja de Morn i d'Röhre. Da wirden ig ersch am Frittig Bscheid übercho. Es tuet mir geng no fescht weh bym Loufe.
Das Bild vo dene schöne Tulpe han ig hüt am Morge gschosse. Ja, d'Sunne tuet sooo guet. I gah jetz de grad no chly use go spaziere mit der M. Si het mir Geschter u Hüt überall ghulfe, syg's bym Choche, bymTisch decke, bym Wösche oder o bym Braschte...Es isch schön, Mal nid so allei z'sy we di Andere schaffe.