Nach em ne Erholigstag won ig gar nüt gmacht ha ussert Liege und zwüschyne kurz ufstah, bin i nach ere Wuche z'erschte Mal wieder d'Obe go schlafe. Hüt bin ig scho sehr früeh wach gsy, am 02.30 Uhr u ha nächär nume no döset. Mir hei du vor em Sächsi scho Zmörgelet. Der Kurt isch no Mal is Bett u ig bi bis d'Gäst am Mittag cho sy i mys Tages Zimmer go liege.
My Maa isch phänomenal! Är het für zäh Persone es bombastisches Zmittag gmacht inklusiv Apéro: Überbacheni Nachos u Guacamole derzue feini Olive. Nächär, Coleslaw, Grüene Salat, Pommes Frittes. Kalbshohrügge am Stück, Entrecôte, Pouletbrüstli, Vegi Burger, Maiskölbe, alles d'Usse uf em Grill gmacht. D'Sarah het e feini Chrütterbutter u zum Dessert e Himbeeri Schitterhuufe gmacht u mitbracht. https://www.gusto.at/rezepte/scheiterhaufen-himbeeren
Mir hei Hüt üsi Vier Kinder u die wo im Studio byr Ufnahm vo Lieder mitghulfe hei zum ne Dankesässe yglade. Es isch mega schön gsy. D'Lieder töne scho wunderschön, sy aber no nid ir definitive Version. I ha's bis am Vieri usghalte im Rollstuehl am Tisch z'höckle u liege sider wieder. D'Schmärze si jetz vor allem im Rügge u mys rächte Bei schmärzt o wenn ig druf stah. Es füehlt sech geng no so aa als würd's mi nid möge trage, das Bei. I wirde o Hinecht wi Gester, mit de Chrücke ufe go schlafe. Das isch guets Muskeltraining...