Vorgester bin ig am Nami e gueti Stund bym Mamie gsy. Si isch ir Nacht vom Samstig uf e Sunndig umgheit u het sech irgend Öppis im undere Rügge gquetscht. Si het fasch nid gwüsst wie liege u het vor Schmärze zwüschyne grad gschroue. Es isch würklech o für mi fasch nid usz'halte gsy. I verstah se so guet u weiss sälber wi's tuet. I bi nächär sofort ume go liege u bi fix und fertig gsy...
Hüt am Morge isch der Kurt mit mir uf Burgdorf gfahre. Er het mi im Spital usglade u isch öppis go liefere, het ygkouft u isch sälber i d'Therapie zur G. I dere Zyt bin ig uf d'Onko go ne Leitig lege u nächär is CT. Es hät di Leitig gar nid bruucht...si hei ke Kontrastmittel müesse ynelah...I bi nächär is Tearoom go nes Latte Macchiato trinke u nes Gipfeli derzue ässe. Der A. het o grad Pouse gha u isch zu mir ghöcklet bevor är am nen andere Tisch e Sitzig gha het. Das het guet tah kurz mit ihm z'pläuderle. I ha no nes Mandarinli ggässe u bi um di Zähni zum Houptygang uf my Schatz go warte. Är isch gly Mal cho u mir sy Hei gfahre. I bi gärn sofort ume go liege. Mys rächte Chnöi isch geng no gschwulle u der Rügge füehlt sech müed aa...D'Ärztin für Palliativ Pfleg wird mir aalütte u säge, was me bym CT gseh het u was si empfiehlt z'mache.
Jetz schmöckt's mega guet vor Chuchi här. My Schatz het Pouletflügeli uf Gmües-Pilz u Härdöpfu im Ofe gmacht. Es git grad Hunger!
.