Jetz han ig e Stund lang gschrybe u e falschi Taschte drückt...i muess vo vore afah...
Also: Der Kurt het chönne am Mändignamittag go dä Rollstuehl hole. Mys rächte Bei füehlt sech schwach aa und ig ha der Ydruck es wöll mi nümm trage...
I ha Gester vor em Zmittag duschet. Der Kurt het mir e Plastikstuehl i d'Dusche gstellt gha...Nach em Ässe bin ig total kaputt is Bett gheit u ha mi fasch verschlafe. Zum Glück isch o im Spital d'Ärztin im Verzug gsy...Si het sech würklech Zyt gnoh für üs. Während 1,5 Stund hei mir zäme my Behandligsplan aktualisiert. Si het mir einiges erklärt won ig o uf myre Patiänteverfüegig wirde müesse aktualisiere. Si het o der Ydruck, dass myni Beigschicht vom Rügge usgeit u het es CT vom ungere Rügge u vom Becki verordnet. I cha scho am Frittigmorge gah.
I füehle mi o bi ihre guet ufghobe u Ärnscht gno. I muess nüt mache won ig nid wott u weiss, dass si so viel wi nötig mache u so wenig wi möglech. Es lüüchtet mir y, dass gwüssi Behandlige glych besser im Spital chöi gmacht wärde und ig aber immer nach Wunsch Hei darf. Es muess ja nid immer so usgah wi letscht Jahr...
Nach em Zmorge han ig Härdöpfu grüschtet. Es git Hüt zum Zmittag feine früsche Blattspinat, Spiegeleier u Salzhärdöpfu.