Geschter am Morge isch der H. üse lieb Chüngeli Lieferant cho. Är isch en Allrounder wo immer bereit isch e Stappler oder e Kapputti Maschine z'flicke. Jedesmal, wenn er da häre chunnt bringt är mir schöni Blueme. Der Kurt het der Chüngu scho verarbeitet für Morn zum Zmittag.
Am Namittag sy der A. u d'U. cho. Si hei mir o nes schöns Arengement bracht. Si hei no mit üs Znacht ggässe. Der Kurt het Feini Wildfang Lachstranche uf Belugalinse a re bruune Sauce mit feine chlyne Rüebli gkochet.
I muess nach wi vor mit em Bürostuehl dür d'Wohnig zoge wärde. O s'Ufstah isch no rächt müehsam. Zum Glück mag mi Körper meh Morphium verlyde. I ha chly Angscht gha, dass es mir schlächt wird, drum nimen ig prophylaxisch öppis dergäge.
Hüt am Morge isch der Kurt allei i Gottesdienscht. I ha dä vom vorletschte Sunndig uf Youtube gluegt.
Am Namittag sy d'H. u der D. uf Bsuech cho. Bevor si cho sy han ig e ganzi Stund mit em Mamie telefoniert. Si hei mir o nes Bluemetöpfli bracht. D'H. het feine Vierfrüchtechueche gmacht: Öpfu, Bire, Aprikose u Zwätschge het's druf gha u feiiin isch er gsy. Zu allem zue hei si no drüü Bitze Schwedeturte gbracht. Si sy scho ume Hei gange.
I bi gschpannt wie lang ig so Müeh wirde ha mit myne Bei u mym Rügge. Es isch würklech gar nid gäbig!