Geschter am Abe han ig es Bad gnoh, wo der Kurt nach ere Sitzig Hei cho isch. I wage mir's nümme allei. Für use z'cho, gahn ig aube uf d'Knöi u häbe mi guet am Rand vor Badwanne. Won ig mi dräit ha u uf d'Knöi bi, han i plötzlech im rächte Bei e mega starche Schmärz gha u derzue het mir wi d'Kraft im Bei gfäut. I ha fasch gschroue vor Schmärz u der Kurt isch mir sofort z'Hilf cho. Es het e soooo weh tah, dass es mir grad gschmuech isch worde. I ha du e Tablette gäge s'Erbräche gnoh u no 50mg meh Palexia ygworfe. I ha z'ersch gmeint, es chönnti broche sy u ha no dänkt, es chönnt o e Thrombose sy. Am Bei het me aber nüt aagseh. Da ig nid is Spital ha wölle, han ig der gross Keil unger d'Bei gnoh u ha probiert mi z'beruhige. I ha fasch di ganzi Nacht düre gwimmeret u ha es paar Mau gschlafe. Am Vieri han ig du doch uf's WC müesse. Der Kurt het mi mit de Bürostüehl desume gfergget. I bi so dankbar um my Schatz. Was miech ig o ohni ihn? I ha nächär tatsächlech no Mal chönne schlafe bis der Wecker tschäderet het. No vor em Achti han ig der Palliativ Spitex aaglütte. Si het mir empfohle bym Huusarzt um ene Termin z'bitte. Das han ig o grad gmacht u ha am 08.30 Uhr scho dörfe dört sy. I ha no nes Paar Krücke im Keller gha. Jede Schritt het aber
furchbar weh tah. My Schatz isch mitcho.
Nach em ne Röntge u Ultraschalle vom rächte Bei, hei mir scho Mal chönne e Bruch und e Thrombose usschliesse. Mir hei ender uf e ne Muskuzerrig düttet.
i ha en Entzüngishemmer mit kombiniertem Mageschoner übercho. No uf em Parkplatz hei mir is Orthoteam aaglütte. Es paar Minute später het d'C. zrügg glütte. Si het mi am 12.15 Uhr, während ihrer Mittagspouse no ynedrückt. E so Lieb <3
I ha ir Kantina uf der Polstergruppe gwartet bis mir uf Burgdorf hei chönne fahre. D'C. het grad sofort myni Wirbusühle afa löse. Es isch ydrücklech gsy z'gspüre wie ig plötzlech wieder i Buuch abe gschnufet ha. Höchscht wahrschynlech han ig bym Verdräie vo geschter am Abe, bi eim vo myne kaputte Wirble, d'Bandschybe uf e Närv gschobe u die het's yklemmt. I ha nach wi vor e gzerrte Musku im Ungerschänku. Es het grad alles verkrampft gha i däm Bei. U nach em Termin byr C. isch vieles ume glöst gsy.
Daheime aacho, hei mir no Zmittag ggässe u syder ligen ig im ungere Bett. Wenn ig mi nid bewege, de isch der Schmärz usz'halte, was letschti Nacht nid der Fall isch gsy. I hoffe, nächscht Nacht mi wieder chönne z'erhole.