I ha Gester immer no Nachwehe gha vo myre stränge letschte Wuche. I ha zwar glych gwösche aber nid so viel, nume zwöi Maschine u di einti chan ig tömblere.
Zum Ässe han ig Räschte Chäschueche u Teigware gwärmt.
Am 09.30 Uhr isch mir ume glunge, mi i d'Livenet Pouse yz'loge. Es isch sehr guet gsy zum Thema: was Guets is neue Jahr überenäh u was nümm, wo vergäh u a was feschthalte. Ja, i bi würklech gspannt uf das neue Jahr!
Hüt het my lieblingsschwigersuhn Geburtstag. I ha s'Grandmaman vor em Mittag lah hole u der Papi vom Pascal isch o cho ässe. Mit drüne vom Büro sy mir siebni gsy zum Zmittag. I ha e Tessinerbrate uf em ne Gmüesbett u derzue e Härdöpfustock gmacht. Der M@i het mir ghulfe s'Gmües u d' Härdöpfu z'schnätzle. Am Nami bin ig grad kaputt gsy vom Choche... Der Päscu het gly nach em Ässe di zwöi Grosshöchstetter Hei tah. Hinecht hei si Fründe u Familie yglade, d'Usse, d'Unger Fondue cho z'ässe. I wirde d'Obe blybe...