Gester sy d'S. u d'Mamie zum Zmittag da gsy. Es isch e langjährigi Fründin wo früecher als Krankeschwöschter zur glyche Zyt wi mir in Kamerun isch gsy. I mag mi guet bsinne wi Di Froue aube in Bonabéri aacho sy u nach mir gfragt hei. I bi scho als Meitschi statt am ne GPS mitgfahre. I ha denn Douala guet kennt u ha Gott sei Dank der Orientierigssinn vo mym Papi g'erbt.
My Maa het 10 Kilo Suurkrut gkouft. I ha öppe 2,3 Kg dervo mit Bratfett, Zibele, Griechische Lorbeerblätter u Wachholderbeeri gkochet. Derzue han ig Salzhärdöpfu gmacht u zwöi Rollschinkli im Ofe a re Wy-Senf Marinade u 30 Minute vor Schluss no mit Honig ygschtriche.
My Maa isch a der Beärdigung vo sym Unkle ir Ostschwyz gsy u drum erscht am Abe Hei cho.
Hüt am Morge han ig's ume gschafft i Zoom vor Pouse vom Livenet z'gha. I ha mit usgwäschnem roue Suukrut, Rüebli, Honig, Joghurt, Zitronesaft, Sänf u Mayonnaise e Coleslaw gmacht. I bi nächär so kapput gsy, dass ig im Büro um Hilf ha müesse bitte. Es het Hamburger ggäh mit Tomate, Zibele usw...
Hüt am Namittag isch my Schatz mitcho uf Burgdorf. Mir hei üs mit em Onkolog troffe u hei ihm bestätiget, dass es guet sygi e Termin mit der Spezialärztin für Palliativecare abz'mache. I wirde de ufbotte.