Zum Sächzgischte fyyre mit em Zmittag sy mir yglade gsy. Der Jonathan het scho der ganz Morge syni Garbonada uf em Füür la plöderle. Der Jamie u sy Papi, der Michael hei beidi o ghulfe rüehre.
Z'ersch sy mir d'Ynne gsy u hei verschiedeni feini Snacks u Apéro übercho. Es het Olive, Kochbanane Chips, gfüllti Pepperonchinis, Chäs, Gänseläbere, Krackers ggäh u einigi Drinks.
Zum Houptgang, sy mir use is beheizte Rancho...
Für's Dessert u Kaffi sy mir wieder yne i di warmi Stube. Es isch gmüetlech gsy, vo A bis Z. Vor allem für d'Mamie isch es schön gsy, ihri drüü Kinder mit Partner um sech ume z'ha u no die Änkle u d'Uränkelin vo Riedtwil.
Hüt am Morge si der Stephan, d'Flavia u der Even bi mir cho Zmörgele. Es tuet guet zäme us z'tuusche u enang z'Härz z'zeige.
I bi so dankbar für myni tolli Familie, sygs d'Ursprungsfamilie aber o myni Kinder mit Partner u d'Kindeskinder.
Am Zwöi han ig dörfe e Guetschyn yylöse vom Adväntskaländer. D'D. isch zu mir cho u het mir e wohltuendi Fuesspfleg gmacht. Das het megaguet tah. Danke!
Hinecht hei mir ume Bsuech vo R. u P. I freue mi uf di feini sälbergmachti Züpfe u em delikate Rouchlachs mit verschiedene Zuetate u natürlech de feine Wyys.