Gester han ig nid möge i Gottesdienst gah. Leider isch nach ere Halbstund d'Verbindig vo mym Handy zu däm vom Kurt ir Predig abbroche. Zum Glück wird ja jetz d'Predig ufgnoh, de chan ig se de später ab Podcast lose...
Zum Zmittag hei mir Bsuech gha vo R. & H. Da d'Sabrina nid Daheime isch gsy,
isch du später o der M@i derzue gstosse. Es het zur Vorspyys delikat gräucherete Lachs uf em ne gmischte Blattslat a re sälbergmacht italiänische Sauce ggäh. Us Houptgang het's feini Rossentrecôtes, Ryys u Blattspinet mit Pepperoni u Pepperoncini ggäh.
Am Abe sy mir e so müed gsy, dass mir beidi scho am Sächsi is Bett sy.
Hüt am Morge han ig us em Adväntskaländer won ig vo de Lüt us der Chiuche übercho ha, es Ängeli uspackt. I ha am Samstig für Hüt vo re liebe Familie wo o i de Famillie Ferie am Meer in Griecheland gsy isch, e Klousesack übercho.
Am Zähni sy zwöi Froue vom palliativ Care Team da gsy. Frou N. het mi derzue ermuetiget am Onkolog z'säge was ig wott u was nid. I ha nachdäm si gange sy uf Burgdorf aaglütte u ihm lah usrichte, dass ig ke Chemotherapie meh wöu, sondern palliativ wöll wyter begleitet wärde. I ha das über's Wuchenändi unger Anderne o mit em Kurt besproche. I weiss mi i Gottes Händ u dä gseht wyter als ig!