Vor em Mittag isch d'R. mi cho bsueche. I kenne se syt si Teenie isch. I ha denn no z'Grosshöchstetten gwohnt u si in Konolfingen. Si het denn ihre Papi verlore und i ha se albe gholt u bi mit ihre i Usgang. I ha se denn o motiviert zum Pianospiele. Mir hei üs immer wieder Mal gseh, hei süsch nid gross Kontakt gha...Letscht Jahr, han ig ar Beärdigung vo ihrer Muetter Französischi Lieder gsunge. I ha o si guet kennt gha, si isch o ne Wältschi gsy. D'R. het gester feine Käschueche u Nidlechueche zum Zmittag bracht.
Gäge Abe isch der Kurt go Tisch u Bänk u Deko häretue. Am 19.00 Uhr sy di erschte Froue cho. D'Froue Chlygruppe vor BPlus Konolfingen het organisiert gha. Üsi Sarah het mit ere andere Frou zäme Bluemechöhli u Kürbissuppe gmacht. Derzue het me chönne Brot, brätleti Späckwürfeli oder Champignons. Es het Glüehwy ggäh, Punch, Tee u später zum Dessert no Kaffi. Es isch e ganz e gmüetlechen Abe gsy.
Es sy 30 Froue cho, einigi vo myne Fründinne sy o derby gsy. I bi o d'unger gsy, u bi hurti chly go liege won ig ganz kalti Füess ha gha. Nach em ne Stündli, bin ig umen abe u bi ungere Wärmepilz ghocket. Es isch mega schön gsy. Si hei Gruppe bildet gha u hei zum Thema Freiheit öppis vortreit. Es isch sehr kreativ gsy, was i so kurzer Zyt zäme cho isch. Si hei aaschliessend zäme für mi bättet. Das het mir
guet tah! I ha letscht Nacht nume einisch uf müesse u bi gly wieder ygschlafe.