Der David isch go d'Grandmaman hole. Me cha se jetz nur no mit em ne Zertifikat go bsueche. I ha bym BAG für si es Zertifikat bstellt, da si bis Gester wäg em ne positive PCR Test in Isolation gsy isch. Si het, Gott sei Dank, ussert ere feschte Müedigkeit u am ne stärkere Vergässe, e liechte Verlouf vor Viruserchrankig gha u gilt jetz al „Genesene“.
D'Sarah het Spaghetti mit Fäderkohl, Tomate, Späck u Nidle kochet. I ha no Pouletflügeli gwürzt u i Ofe tah. Es isch für's Mamie immer e Fröid, öppis chönne z'gnagge. Si isch nach em Zmittag für zwöi Stund uf der Polstergruppe go schlafe. Sie isch nächär bi mir im Zimmer gsy, isch im Sässel ghöcklet u het sech gfröit mit mir z'pläuderle. David het se gäge 16 Uhr wieder i Landblick gfahre.
Kurt ist scho fasch di ganzi Wuche in Willisau. Der Lackierer fallt wäge re Operation uus u d'Ufträge müesse termingrächt fertig sy. Kurt isch froh gsy am Abe no ne Portion Spaghetti z'überchoh.
Di letschti Nacht isch gar nid guet gsy. Myni Lunge het mir links weh tah u rächts het äuä ume nes Rippi la gah. I ha fasch nid gwüsst wie liege. 'Bi sicher sächs Mal uf u bi zwöi Mal uf s'ungere Bett go liege.
Hüt het mir der M@i hurti ghulfe Louch u Härdöpfu für ne Suppe u Kürbis u Süesshärdöpfu zu Ofefrittes z'rüschte. I ha derzue no Schwynsplätzli brätlet.
Der Onkolog het mir scho hüt am Nami aaglütte. Der Tumormarker Wärt heig sech meh als verdopplet. Är würdi mir empfähle, nächst Wuche es CT z'mache u übernächsti mit ere Chemo aaz'fah wo nid wi di Letschti e ganzi Stund bruucht zum yne loufe, sondern i zäh Minute d'inne syg. I müessi de mit der Yyshube luege myni Haar z'rette aber es verursachi kener Sensibilitätsstörige. I weiss würklech nid, öb ig das würklech wott.