Am viertel vor Elfi han ig Gester müesse ir Onkologie sy. Frau B. het mir e Bluetentnahm gmacht für d'Bluetwärte u der Tumor Marker z'bestimme. I bi froh isch der Kurt mitcho zum aaschliessende Gspräch mit em Onkolog. Diese het mir verschiedeni Therapie erklärt won är würd i Betracht zieh, falls der Tumor-marker ume ufe göngi. Är wird mir am Frittig aalütte für mir d'Wärte dürez'gäh.
Mir hei uf em Heiwäg dörfe bir M. go s'Zmittag hole. Si het für üs feini Kabiswickel mitRys u Gmües drinne u Poulet druffe. Es isch so fein gsy!
I ha am Nami viel Fernseh gluegt. D'Frou N. vor Onkospitex het mir aaglütte.
Das het mir guet tah, ihri Rückfrage z'beantworte. I mache mir Gedanke, wie wyter?! - wot ig no Mal e Chemo?! - wott ig wieder d'Haar verliere?! - wott ig en Antihormon Kur?! - was heisst Läbesqualität?! - geit's mir nächär würklech besser?! - was han ig nächär für blybendi Schäde wi jetz di Sensibilitätsstörige i der Finger u vor allem i de Füess?! Der Arzt het mir klar gseit, myni Krankheit syg nid heilbar. Die Therapie tüege eifach s'Läbe no chly verlängere.
Hüt bin ig o vorwiegend am Liege. I ha mit em Mamie gredt wo Hüt ändlech us der Isolation entlah worden isch.
Zum Znüni han ig ume Bsuech gha vor R. wo Gipfeli bracht het. Das freut nid nume mi, sondern alli vo Büro wo hie ihri Znünipouse chöme cho mache. Der Stephan, d'Flavia u der Even hei o öppis z'Nüni gnoh.
Der M@i isch mir nächär cho hälfe choche. Zu re Röschti het är e feini Sauce gmacht mit zwöine Truteblätzli u Pepperoni won är gschnätzlet u mit Noilly Prat abglöscht u mit Gwürz, Gmüesräschte u Nidle-Milch-Maizena berycheret het. Es het no zwöi brätleti, marinierti Schwynsblätzli gha u süsch no Räschte vom Sunndig.
D'Usse schneit's u s'isch ganz düschter...I bi froh dörfe d'Inne ar Wärmi sy!