I ha mi Hüt vom Wuchenändi müesse erhole. I bi der ganz Morge i mym Spitalbett gsy.
Geschter sy der Kurt u ig in Thun ar Pensionierigsfyyr vom ne Pastor wo früecher i üsere Chile in Konufinge gschaffet het. Der Kurt isch aagfragt worde, als Verträtter vo Konufinge während der Fyyr e Laudazio z'halte. Mir sy nach wie vor Fründe blybe u sy yglade gsy aschliessend mit ihm, syre Familie u einigi Fründe go Zmittag z'ässe u zäme z'fyyre. Mir sy fasch bis am Füfi im Quellehof in Üetedorf blybe. Es isch so richtig gmüetlech gsy, im Cheminée Ruum. D'Gastgäbere het ganz fein gkochet gha: e chüschtigi Kürbissuppe mit Blätterteigstängeli mit Zatarr Gwürz vo Akaba. Nöii Härdöpfu mit Fänchu u Rüebli im Ofen brätlet mit Thymian us Akaba, derzue Pouletbrüstli i re feine Sauce. Später het's de es Dessert Büffet ggäh. Da het's e feini Moschtcreme, es Schoggimousse, Blächchueche, Orangesalat mit Dattle us Akaba u Nidle plus Nidletäffeli. D'J. isch grad kürzlech vo re Reis uf Jordanie zrüggcho u het gwüsses Hei bracht.
Hüt gäge halbi Zwölfi het d'Sarah gfragt, öb ig gnueg Zmittag heigi no für si. I ha du eifach d'Hackfleischsauce mit Bratesauce gstreckt u ha es grosses Pack Spaghetti übertah. I ha no Räschte Pizza vom Samstig gha. D'Sarah het noPouletnuggets u feine Salat vom Guggisbärg bracht. Si isch mit em Päscu u de zwe junge Giele vo Thürs cho ässe. Ja, si hei se übers Wuchenändi u bis Hinecht goumet. Ihri Eltere hei es Wuchenändi zu Zwöit bruucht. I ha dä Namittag im Spitalbett verbracht u ha zwe romantischi Wiehnachtsfilme gluegt.
Won ig mit em Mamie wo ir Isolation isch am telefoniere bi gsy, het my Schatz aaglütte. Är het no müesse uf Frutige u uf Grindelwald go Möbu liefere. I ha ihm
gseit, i chömm o mit. So sy mir am viertu vor Füfi losgfahre. Är het beidnen Orte usglade u het in Grindelwald no gholfe di Möbu grad i die Zimmer yne z'trage wo sy härechöme. Wo mir s'Outo ume aaglah hei, isch grad d'Heizig usgstyge. Mir hei gly Mal müesse aahalte u d'Jacken aalege. Vo Wilderswil aa, het der Kurt müesse fahre u ig ha ne Zügeldechi über myni Bei tah. Mir sy beidi froh gsy hei mir d'Winterjacke, Kappe u ig sogar Händsche derby gha. Es isch fei chalt worde bis mir Daheime si gsy. Zum Glück geit üsi Heizig Daheime.