Am Donnstigabe het's mi grüehrt, wo der Gärtner vo hie mir e prächtige Struss vom Livenet-Team u mir zuesätzlech vo ihm u syre Frou drü wunderschöni Rose bracht het. Si heige zäme d'Sändig vom "Fenster zum Sonntag" gluegt u syge sehr betroffe gsy u wünschi mir dermit alles Gueti.
Am haubi Siebni hei sech d'EVP Froue vo Bigle bi mir troffe um zäme aaz'luege, wie wyter. I tritte krankheitshalber ab sofort als Copresidäntin zrügg. Da mir zwöi Lüt i Kommissione hei, git's trotzdäm wyterhin en EVP Biglen.
Gester am Namittag bin ig uf di 14.30 Uhr zur Schmärzärztin. Mir hei zäme beschlosse, dass ig bis 2 x 300 mg Palexia u ir Resärve 10er Oxynorm nime. Nach em Teste, bin ig go d'I. hole u mir sy zäme uf Langnou i d'Chiuche. Dört hei mir
en Yladig mit Zertifikat gha zum ne Dankabe vom Projekt "zusammen hier". I ha ja von Januar bis im Oktober 2020 d'Astellig als Koordinatorin vo Tandems zwüsche Freiwillige us der Bevölkerig u neu Zuezogni bi der Reformierte Chiuche vo Konufinge gha. D'Andrea wo in Langnou die Arbeit macht, het du wüu i Chrank bi worde Afangs 2021 o myni Stell übernoh. Es isch so schön gsy z'gseh u z'ghöre, dass si das mit so viel Härzbluet macht. Si wird ab Januar 2022 d'Stell in Konolfinge chönne ar Susanne Hämmerli übergäh, was mi sehr freut. I finde d'Susanne total g'eignet für die Stell u weiss, dass o si das ganz i mym Sinn wird wyterfüehre. Es hei zwe Manne u ei Frou us Anatolie zäme di musikalischi Umrahmig vom Abe gmacht. Es isch sehr schön gsy!
I ha nächär no d'I. Hei tah.
Hüt am Morge sy der Kurt u ig mit em Peter uf Lützuflüeh go bade. Mir hei ihn nächär zum R. bracht u si uf Ranflüeh i Bären mit em David u syne Kids go Zmittag ässe.
Der M. het Hüt si 50. Geburtstag gfyyret. Mir hei ihm e Fläsche feine Rote i Lade vor I. bracht. Nach em zäme käffele, het är üs yglade mit ihm u der I. zur Feier des Tages, zum ne Fründ vo ihne go ne Pizza z'ässe. Mir sy du zäme uf Ostermundige i d'Pizzeria. Es isch mega Fein gsy! Wo der Pizzajolo vernoh het, dass der M. Geburtstag fyyret, het är no ne süessi Pizza gmacht mit schwarzer Toblerone druf. Das isch de lecker gsy!