Ja, es isch würklech jetz Herbscht worde. Gester am Mittag het's Spaghetti mit ghacktem Pouletfleisch u Federkohl a re Nidlesauce zum Zmittag ggäh. Nächär han ig Bsuech gha vor B. Si het mir e schöni Rose bracht. Die Blueme won ig vor zwöi Wuchen übercho ha si o i trockenem Zuestand no schön. O dusse si d'Bäum sooo schön! I mag mi nid bsinne, wenn as der Herbscht s'letschte Mal e so farbig isch gsy.
Hüt am Morge isch d'Ruth zum Znüni cho u isch o grad bir Livenet Pouse derby gsy.
Am Mittag hei mir sälber gmachti Hamburger gkochet. Der M@i het se ganz guet gwürzt gha.
Am Nami hät ig is Mosaikträff wölle aber i ha gar nid möge...I ha ja syt em Mändigabe ume Methadon u ha's grad gschpürt. Mi Körper muess sech ume draa gwöhne.