Gester hei mir liebe Bsuech vo Züri gha. Vor sächs Jahre sy mir zäme in Kamerun gsy. Vorhär hei mir zwöi Jahr lang zäme ar Schuel für Sozialbegleitig d'Schuelbank drückt gha. Ihre Maa isch e Schwyzer u si isch ursprünglech us Kamerun. Das isch üs denn uf der Reis öppedie Kommod cho, wenn si isch fürs Hotelzimmer go verhandle u mir üs als Wyssi versteckt hei u erscht fürecho sy, we der Pryys abgmacht isch gsy...Es si ganz schöni Ferie gsy, denn.
Es isch gester o ganz e schöne Namittag gsy, zäme.
Hüt isch d'Sabrina cho Zmittag ässe. Es het Räschte, Rys, Kabis mit Späck u süsch no Sösseli ggäh. Si het mi grad mitgno uf Burgdorf. I ha am Zwöi e Termin gha bi der Schmärzärztin. Dört hei mir zäme besproche, dass ig Hinecht ume aafa mit Methadon. Es tüecht mi, dass s'Palexia nümme mag gfahre gäge myni Knocheschmärze...S'letschte Mal won ig die probiert ha, sy myni Läberewärte nüm guet gsy, drumm muess ig de am Frittig scho ume go Bluetnäh u d'Läberewärte aaluege...
Nach der Schmärzärztin, han ig mit mym Onkolog abgmacht gha, dass ig ihm no chume cho säge, was ig entschiede ha in Bezug uf wyteri Behandlige. I ha entschiede, dass ig die vo ihm vorgschlageni Hormontherapie nid mache, da ig nid no zuesätzlechi Glänkschmärze wöll. I ha derfür Ungerlage über Arthemisia Anua mitbracht u ha ihm gseit, i tüeg lieber das näh. Es git Studiene wo si mit Extrakt vo dere Pflanze gueti Erfahrige gmacht hei ir Kräbsbekämpfig.
Hinecht hei mir Bsuech gha vo R. u P. Si hei feini Züpfe u Wyy mitbracht u mir hei s'Andere derzue uftischet: Fleisch, Käs, Hummus u süsch feini Sauce u Ygleits... Es isch wi geng gmüetlech u schön gsy. Jetz nimen ig de mys Tablettli u gah de is Bett...