Gester am Morge bin ig ume ir Pouse vom Livenet gsy. Am Mittag sy mir sächsi gsy u d'19 Ommelette hei knapp glängt. Derzue han ig e Pilzsauce, Salat u Öpfumues gmacht. D'Sarah het mi mit em Outo uf Burgdorf begleitet u isch ume is Büro. I bin ig am 14.30 Uhr uf d'Onkologie Station go ne Leitig setze. D'Frou M. isch da gsy. Si het se uf Aahieb ynetah. I bi nächär i d'Radiologie go nes CT mache. Si hei nach der Halbzyt, Kontrastmittu ynegla. Das het richtig brönnt wo's yne isch. Der Radiolog het mi nächär no gfagt, öb ig guet chönn schnuufe. I han ihm du bestätiget, dass ig scho öppedie Müeh heigi...Won ig fertig bi gsy, bin i mit em Bus zu R. u P. Si het grad Geburtstag gha. Der Kurt isch vo Willisau diräkt zu ihne cho u mir hei zäme Schwarzwälder u nes feins Espresso gnosse.
Hüt am Morge isch d'Ruth mit zwöi vo ihrne Tageskinder cho. Si het feini Gipfeli bracht. Zum Zmittag het's vom M@i e Räschte Rancher Topf gha. I ha derzue zwöi Pouletbrüschtli, Vier Lammkotelette, früsche Blattspiet u no Garri gmacht. Das isch e Spezialität us em Süd-West-Kamerun u us Nigeria.
Nach em Kaffi bin ig no chly go Liege. Der Kurt isch mit mir uf Burgdorf cho. I bi froh gsy. Der Onkolog het gseit, dass di nöie Schmärze erklärbar syge. Metastase heige ume es Rippi verfrässe u das sygi abenang me gsäch uf em CT d'Bruchstell. Der Erguss bym Brustfäll sygi o grösser worde. Är empfielt mir das Rippi lah z'bestrahle u ne Anti Hormon Therapie z'starte. I ha ihm g'antwortet är chönn mi aamälde für z'Bestrahle. I tüeg ihm de am Mändig Namittag säge, was ig zum Thema Therapie entschiede heigi. Thürs sy no cho ne Apéro näh. Jetz isch es ume ganz ruhig. I gah gly is Bett. I bi irgendwie mega müed...