Mys Zertifikat isch am Morge no gültig gsy. Das het mi derzue bewoge, uf Lützelflüeh is Solbad z'gah. I ha ja dört e 10-Ytritt-Karte gkouft gha für aube mit em Pesche go z'bade. Mit em ne Ufprys vo 10 Franke han ig, nachdäm ig e Halb Stund im Wasser hin u här bi, i d'Wellness chönne. Es isch Frouetag gsy.
Am Elfi bin ig scho ume uf em Heiwäg gsy. Mit de Louch-Schinkerolle u em Rys Räschte vor Sarah u mym Znacht vom Sunndig wo si mir ypackt hei gha, hei mir
z'füfte höch gnueg Zmittag gha.
Am Namittag isch no d'S. cho nes Käffeli näh u süsch han ig gar nüt gmacht.
Hüt am Morge han ig gwösche u nes Poulet-Härdöpfu-Gratin gmacht. Der M@i het no Salat gwäsche derzue. Vor em Zmittag het mir der Onkolog aaglütte u gmäldet, dass der Tumormarker ume am styge sygi. Är wöll no die Wuche es CT i Uftrag gäh. Si tüege mir de aalütte wäg de Terrmine.
Nach em Zmittag bin ig uf Burgdorf d'M. go bsueche u ha en Absag übercho für i d'Osteopathie. Per Telefon han ig für Morn e CT- u für Übermorn e Gsprächstermin bym Arzt yne übercho.
I ha am Vieri mit em Flo Wüthrich abgmacht wo mi gfilmet het für ne Livenet Alass vo Morn Abe. I ha ihn mit em Cabrio Hei gstellt u ha bi ihne no öppis trunke. Dank däm ig d'Fäischter ufe tah, e Sitzheizig u d'Heizig voll ufdräit ha, het myni Winterkappe u s'Halstuech glängt. I bi über s'Krouchtal u Utzige, mit offenem Dach Heigfahre.