Ja, syt gester gägen Abe bin ig wieder Daheime.
Am Morge han ig am Sächsi im Spyssaal vom Aldemar müesse sy. D'Mägi wo d'Usflüg begleitet het e chly später müesse dört sy. Der Usflug uf Kefalonia isch uf em Programm gsy. Si het grad s'Zimmer näbe mir gha u het mir ghulfe mys Gepäck füre z'röllele. I ha zwöi Rollköfferli u mys Handtäschli gha. I ha so wenig gschlafe u ha no gar ke Hunger gha. Das wo's gäh het het mi gar nid gluschtet...Es Münzetee het mir grad glängt. I ha mit em erste vo einige Cars a Flughafe chönne fahre. Dört aacho han ig di glychi Idee gha wi d'P. Mir hei nämlech beidi lieber z'erscht es richtigs Capuccino gha u sy zum Warte häreghocket. Mir hei gwartet bis fasch alli ychecket hei u sy mit de Letschte nume no paar Meter aagstande. Es isch ja e Flüger voll us em Aldemar Heireisendi gsy. Mir hei i de hinderschte Reihe über e Gang yy e Platz übercho. Es isch nid so gäbig gsy zum zäme braschte, drum hei mir abgmacht in Züri zäme no öppis go z'ässe. Der Kurt het vom Samstig uf e Sunndig in Wilderswil gschlafe. Är het no mit der Familie Stöckli u am Vreni zäme mit em Opa zu sym 88. Geburtstag Zmorge ggässe. Er het üs kurz vo em Zwölfi gholt. Mir hei d'P. Hei gstellt u sy no mit ihre am ne schönen Ort nid wyt vo ihrer Wohnig öppis go zieh. Zur Feier des Tages hei mir no a re Flugschou chönne zueluege. Es isch also gfühlt wärmer u schöner gsy als i däm i de letschte Täg rägnerische Griecheland...
Mir sy uf em Heiwäg no bym Grandmaman verby u hei ihre uf em Laptop d'Sändig vom "Fenster zum Sonntag" zeigt.
I ha ir letschte Nacht besser gschlafe. Halt wieder i mym Bett!
Hüt bin ig am wösche u chume langsam wieder Daheime aa. Di Andere sy am Schaffe u gly chöme si cho Znüni näh. I fröie mi, si alli ume z'gseh...