I de letschte Täg het's hüüfig grägnet, drum hei si d'Strand- u d'Poolbar zue tah. Mir hei ja hie All-Inclusiv. Das heisst, dass mir ab em Zähni so viel Capuccino u Drinks chöi drinke wi mir wei. Bis jetz hei mir mängi gueti Begägnig gha im Kioski. Das isch di schöni Strandbar mit myne lieblings Barkeeper. Si hei sogar e Fläsche Otto für üs bsorget. Das isch e griechischi Kopie vom Martini Rosso. Am Kurt u my Lieblingsdrink isch: Athenian Spritz. Da chunnt äbe vo däm Otto dry, Prosecco, Tonic-Wasser u Yswürfle. Dä isch äbe nid so süess, sogar chly bitter u het nid so viel Alkohol...
Syt letscht Wuche hei mir probiert a re Boutiquebsitzere vo Katakolon Schoggi u nes Büechli z'bringe. Der Kurt isch zwöi Mal mit üsne Fründe u si sy sälber einisch meh vergäbe häre. Der H. u d'R. sy du vorgester uf d'Fähre u hei üs der Uftrag wyterggäh. Gester hei der Kurt u ig dörfe mit liebe Nachbare vo Bigle wo o da sy härefahre. Mir Froue hei no gänggelet u üsi Manne sy ungerdessi mit Tsipuro versorgt worde. Das härzige Boutiquebsytzerpaar het das Gschänk dankbar entgägegnoh u het üs unbedingt e guete Prys für üsi Ychäuf wölle mache.
Mir sy no ar Promenade vo Katalolon eis go zieh u sy nächär ume is'Aldemar.