D'Sarah u der Pascal hei myni Tempuruflag mit em Outo härebracht. I bi so froh drum. Da ig mys Keilküssi nid ha chönne mitnäh, han ig du für e Rügge z'entlaste, mys Rollköfferli ybettet.
I ha d'Nacht vorhär, nach em ne Abe mit de Junge ar Bar, paar Mal uf's Hüsli müesse. Irgend Öppis het mi richtig düreputzt...I bi froh, isch es mir nid schlächt gsy. Gester isch der Tag ume im Nu verbi gsy. I ha bekanntschaft mit der Fründin vor Tante vom Kurt gmacht. I ha ihre am erste Tag hie chönne e Tipp gäh, ihres Zimmer z'finde. Si isch du bym ne Zmorge uf mi zue u het mi gfragt, öb ig d'Chrigi syg. Mir sy syder scho paar Mal zäme ghöcklet. Z'Schöne für hie im Aldemar isch, dass ig jede Tag nöii Lüt cha kennelerne. I bi ja z'letschte Mal vor acht Jahre da gsy. So mängi Person wo denn als Teenie da isch gsy erkennsch plötzlech u bisch erstuunt, dass ungerdessi scho ne nächsti Generation derby isch.
I gniesse hie der morgentlech Generatione Gottesdienst. Dä isch aube mega spannend u sooo schnäll verby. Mir isch eifach aube di blööödi Masken im Wäg!
Es isch so schön gsy hüt am Mittag mit myne Änkle dörfe Zmittag z'ässe. Bis jetz hei mir geng am Abe e Familie-Tisch. Gester am Abe bin ig nach em Znacht e so k.o. gsy, dass ig am Nüni scho is Bett bi. I bi letscht Nacht weniger uf als die vorhär, bi aber so richtig grederet erwachet. I bi froh, han ig gnueg Schmärzmittu derby! Da mys Zimmer nid grad näb em Spyssaal isch, loufen ig fei mänge Kilometer im Tag. so, i muess jetz sofort e Stecker ha für d'Batterie vo mym Laptop ufz'lade...