Gester han ig e totale Nüt-Mach-Tag müesse ylütte. I ha mi müesse vom Wuchenändi erhole. Es isch fasch e chly z'viel gsy. Vor allem am Sunndig, das viele Outofahre u Umehocke...I ha's grad bruucht, nüt z'mache...Am Morge am Nüni het mir der Onkolog aaglütte u het mir gseit i chönni guet i d'Ferie. D'Bluetwärte syge ir Norm gsy. Der Tumormarker syg wieder liecht gstiege. D'Wärmi u d'Ferie wärdi mir sicher guet tue.
Am 08.02 Uhr han ig ar Schmärzärztin aaglütte. Si het grad sälber abgnoh. I ha ihre gseit, dass ig ume meh Schmärze heigi u Bedänke heig, öb di verschriebni Mängi für i d'Ferie längi. I cha am Frittigmorge zu ihre.
Am 16./17. Oktober chunnts de ir Sändig Magazin, Fenster zum Sonntag. Si tüe mi Hüt filme...Ei Tag lang...mit allem Drum u draa. Z'ersch hie, i mym Tageszimmer, nächär mit em Kurt u em Copen. Mir göh äuä de uf d'Gumm, de...
Es sy: E Reporter, e Kameramaa u ne Tontechniker da gsy. Ja, mir sy z'ersch Richtig Kleinrot u hei d'Obe gfilmet u sy nächär tatsächlech uf d'Gumm. Dört hei mir no es Interview gha. Mir sy nächär zu üs Hei. Da hei einigi vor Familie gwartet u o d'R. Es hei drüü vor Familie e Statement ggä. Nach em Zmittag hei si d'R. u mi no d'Usse gfilmet u nächär d'Inne d'Grandmaman u mi. Es het mi scho rächt gschluuchet. Sogar di "Gsunde" si müed gsy.