Hüt am Morge sy mir z'füfte höch, das heisst der M@i, d'Jael, d'Sarah, der Kurt u ig uf Schaffhausen. D'Cousine vom Kurt, Muetterssyts het Geburtstag gha. Si het alli yglade gha, leider hei nid alli chönne cho. Es isch ganz gmüetlech gsy. Z'erscht sy mir i Wykäller go z'Apéro näh, Blätterteigstängle u ne guete Wysswyy. Nächär hei mir i däm schön gschmückte Ruum ggässe. Mir sy knapp zwänzg Lüt gsy. Es het z'erscht e feini Wysswyysuppe mit Trube drynne gäh, nächär Spätzli u nes feins Rindsfilet Stroganov, derzue feine Rotwyy u Münze-Limette-Wasser. Zum Dessert het's de e feine exotische Fruchtsalat mit Ärdbeeriglace, es Panna Cotta mit Himbeerisauce u Schoggichueche. Die wo hei wölle hei no Kaffi oder Tee übercho. Es isch scho fasch Achti gsy, wo mir Hei cho sy. D'Sarah isch Hei gfahre. Es isch fei müehsam gsy zum Fahre, bi Räge. Si het's aber super gmacht. Am Morge won ig gfahre bi het's weniger Verkehr gha...I gah scho gly is Bett. Es sy halt scho fasch füf Stund Outofahrt gsy u das schluuchet!