Am Morge am Siebni sy mir 40 BPlusser, z'Bigle vor der Bläuer Fabrik, im Car gsy u sy abgfahre. Der David het d'Jael bracht wo o isch mitcho. Im Waldhaus am Katzesee hei mir Kaffi u Gipfeli gnoh. I bi no mit em Pesche u der Jael hurti a See gloffe. Vo dört uus sy mir ume mit em Car uf Stein am Rhein gfahre. Dört hei mir der Mittagshalt gmacht. I ha byr Schiffländti ne ganzi Dorade, Kurt het Salzhärdöpfu u ig Pommes u ne griechische Salat ggässe. D'Jael het Nuggets u Pommes mit Ketchup u Mayo u der Pesch e Kinderportion Teigware ggässe.
Am 13.30 Uhr isch üses Schiff Richtig Schaffhausen gfahre. Dört het der Carchauffeur uf üs gwartet u isch mit üs, mit Zwüschehalt in Köllike, id'Nächi vo Sumiswald is Tannebad. D'Jael het vo Schaffhusen aa nume no gschlafe. Der David isch se im Tannebad cho hole. Mir hei dört z'erscht es Salätli u nächär Rahmschnitzel a re Morchelsauce mit Gmües u Pommes u zum Dessert Merängge mit Vanillglace u Nidle ggässe. Am punkt 20.30 Uhr sy mir ume in Bigle gsy. I gah jetz no i myni Badwanne u nächär is Bett.