E so gsehts uus, wenn ig am Schrybe bi. Mir hei vorletscht Wuche Lampene kouft u myni gseht so uus wi uf dere Fotti. I bi nid so zwäg gsy, di letschte Täg. Es sy verschiedeni Faktore. I ha nes Telefon übercho, dass es liebi Fründin gstorben isch. Mir hei i de letschte Mönet immer wieder zäme telefoniert. Si het der dritt Rückfall nach Brustkräbs gha. Si het bis z'Letscht d'Hoffnig nid ufgäh gsund z'wärde. Si sigi am Mittwuch, ir Nacht überegschlafe. Jetz isch si gsund u het kener Schmärze meh. Si gseht jetz, was si gloubt het.
I ha mi grad e chly i mym undere Zimmer verkroche. Am Sunndig han ig der Kurt allei i d'Predig lah gah. Mir hei Liebe Bsuech gha zum Zmittag. I bi sooo froh, tuet mi Maa so gärn choche. E het üs richtig verwöhnt. Zur Vorspys Guaccamole mit brätlete black Tiger Krevette. Nächär hei mir Melone im Portwy übercho. Zum Houptgang het er frittierti, panierti Aubergine u Kürbistranche us em Ofe derzue für d'Manne Tomahawks vom Söuli u für d'Froue, es Rossplätzli gmacht. D'R. het es feins Himbeeridessert bracht gha. I bi vorwiegend uf der Massageliegi gsy. Am Abe, han ig ume nes warms Bad gnoh.
Gester bin ig nume hurti zum Ässe uf u o das aube nume kurz. I bi froh, het d'Sarah Spaghetti a re feine Gmüessauce mit Fleischbitzli u derzue Salat gmacht. I bi so froh, hei mir e Badwanne, de chan ig wenigstens hie bade, wenn ig nid is TimeOut cha.
Hüt am Morge han ig Wösch übertah u d'R. isch grad i däm Momänt cho won ig d'Wöschmaschine uftah ha. Si het mir grad ghulfe Wösch häiche. Si het ume feini Gipfeli bracht. <3 I bi o so froh gsy, het si mir no Kandierts Ingwer us der Merängge Fabrik gholt. So Begägnige tüe guet!
Der Kurt het scho gester am Abe Rindshaxe brätlet u i re feine Sauce im Bräter la brutzle. I ha's bym Znüni scho i Ofe tah u bis am Mittag bi 130 Grad lah bloddere. Es hät's sogar no heisser möge verlyde. Am Mittag het d'Sarah Salat u Stocki derzue gmacht. I ha hüt andlech Pesches Bricht fertig gschrybe u no Rächnige kopiert für d'Rückerstattig. Mir hei scho nes super Sozialsystem! So, myni Badwanne rüeft...
.