Gester het der Stephan der Copen schön putzt am Vieri umebracht. Der Kurt u ig sy z'ersch uf Zollikofe u nächär uf Münchebuchsi go nes Winterouto aaluege. Mir sy nächär uf d'Suechi vo re schöne Beiz mit Abesunne u sy in Aarberg glandet. Dört hei mir bi der K.A. e feine Wysse u der Kurt es feins Käschüechli derzue, zum Apéro gno u si um di Sibni i d'Brück übere. Der Kurt het z'erscht es Caspacho gno u nächär Breitbandnudle mit Rindsfilet Bitze a re asiatische Sauce. I ha ne Beefsteack Tatar gno. Si hei so feini Vollkornbrötli im voruus ggäh, dass ig gar kener Toast bruucht ha. I ha nomal es Brötli verlangt. Derzue het's es Ballönli Rote ggäh u Hahneburger. I ha my Rote am Kurt ggäh. Nach em Ässe sy mir wieder is Städtli ghöcklet u hei byr K.A. s'Espressöli gno, der Kurt het no nes Cognäckli derzue übercho... I bi gfahre, mit em offene Copen. Es isch guet gange, mit Sitzheizig u vo Vore gheitzt.
I ha ir Nacht ume d'Unger müesse schlafe. Mys lädierte Lungefäll tuet mir ume weh. Das han ig öppedie, dass ig nid mit em flache Oberkörper cha liege. Im elektrische Bett hocken ig de fasch...u de geit's...
Hüt am Morge hei mir am Zähni d'Flavia, der Aiden u der Even gholt. Mir hei im Bärau mit em Pesche abgmacht. Si hei dört s'Läbesart Fescht gha. D'Buebe hei der Spielplatz no lieber gha als alli Spieli wo aabotte sy worde. Uf's Karussell sy si nume mit em Mami. Im Hammezält hei mir Zmittag ggässe. Zum Hamme het's Härdöpfusalat ggäh u Zopf. D'Buebe sy lieber ume zu de Rittiplampi. Ig bi mit em Pesche no go ne Rösslifahrt mache. Das Läbesart im Bärau isch ryysig!
Der Kurt isch no hurti mit em Pesche uf Langnou go sys Uhrebändeli lah flicke. I dere Zyt bin ig mit den andere i d'Markthalle go Züpfe poschte. Mir hei no wichtigi Ungerlage im Drütanne abggäh u sy, sobau der Pesche zrügg isch gsy, gäge Hei zue.
Hüt vor 34 Jahr hei der Kurt u ig in Glarus zivil ghürate.
Hinecht göh der Kurt, der M@i u ig uf Üetedorf a nes Konzärt: Im August und September 2021 präsentieren wir unser Konzert - gospopchorthuns Webseite!