Gester hei mir ume eis der ikutTräff gha. Mir hei brätlet, Pouletwürstli, Gmües u zum Dessert Schoggibanane. S'Team het uf em Spielplatz usse brätlet. Di vorderi Tüür hei mir uftah, dass d'Froue gseh wo der Träff isch. Mir sy grad im Dürzug gsy. Mir sy fasch 20 Froue u Kinder gsy. Si hei alli gschmatzt. I ha s'Mamie gholt gha u mir sy um di Viere ume gäge Hei zue. Am Abe bin ig so kaputt gsy, dass ig gly is Bett bi. I ha weh gha u ha meh Palexia bruucht. I bi so froh, dass es mir nid der Darm lähmt wi s'Fentanyl aube.
Hüt han ig wägem Dürzug vo Gester chly Halsweh gha. I bi froh han ig kandierts Ingwer. Hinecht han ig mi no mit em Räschte vom Mosaik Vorstand und der Irena Sitzig gha. Nächscht Wuche wird d'Fachkommission vernäh, was d'Gmeind entschiede het. Am Mittwuch bin ig yglade mit der FaKo go s'Znacht z'ässe. Si göh z'erscht i ne internationali Bibliothek. I gah aber de erscht am Abe uf Bärn i d'Länggass zum Eritreer go Ingera ässe.