Hüt am Morge bin ig mit der Flavia uf d'Bank. Si het am Pesche sys Konto übernoh u macht vo jetz aa syni Zahlige. Solang ig da bi, hilfen ig mit für ihn da z'sy.
Der M@i het hüt Mittag zeigt, dass o är e schnälli Chuchi beherrscht. Innert Minute het är Fleischchügeli u Teigware al olio e aglio härezouberet. I ha nes feins Entrecôte zum Geburtstag übercho won ig Hüt mit allne teilt ha...(i ha scho der grösser Bitz gha...)
I ha nach em Zmittag myni früechere Band-Musiker gfragt mit z'hälfe bi mym wyttere Geburtstagsgschänk. Üsi Kinder hei mir nämlech e Guetschyn ggäh für Studio Ufnahme vo einige Lieder won ig gärn singe oder früecher gsunge ha.
Am Namittag han ig z'erscht am Mamie Schoggi bracht u bi nächär mit em Copen z'ersch a d'Vernissage vom Lorenz Spring . Är het ir Grächtigkeitsgass in Bärn en Usstellig eröffnet. Es isch würklech schön gsy ihn u der Max ume eis zäme z'gseh. Der Lorenz het mir nächär e spannendi Füehrig dür Syni Wärk gmacht. Am bescht het mir dä Ruum mit de Ikone gfälle u syni Erklärige derzue. Är isch e passionierte Künstler u das chunnt übere.
Di nächsti Vernissage isch "im Gjät" usse gsy. Unter Anderem vor Heike Röhle • Meine Werke erzählen Geschichten (heikeroehle.com) Vor allem s'Bild vor Fatima het mi berüehrt.
Si hei mi beidi überzügt. Es het e gwüssi Ähnlechkeit im Usdruck vo ihrne Kunstwärk. Uf all Fäll chunnt bi beidne ihre Gloube düre.
I bi nächär no bi Thürs go Znacht ässe. I bi so froh wohne üsi Liebe alli ir Nächi.