Im Novämber 2011 han ig chönne mit der Schuel in Züri aafah. Es isch e Klass gsy mit coole Lüt. Mir sy ziemli am Aafang uf e Kerenzerbärg enang go kennelerne. Da het näbe Fründschafte, no es Baby druus ggäh...I bi aube äxtra mit em längsämere Zug Heicho, dass ig bis uf Langethal mit der A. ha chönne braschte. Mir hei üs guet verstande. Si het e Grossfamilie...
Nach knapp eim Jahr bin ig krankheitshalber für Nün Mönet usgstiege u im Früehlig 2013 i ne anderi Klass. Es sy ganz anderi Lüt i dere Klass gsy, vor allem es paar Froue wo vo Aafang aa Müeh hei gha mit mir u ig mit ihne... Zum Glück het's d'K. i dere Klass gha. Si isch vom Bärner Oberland här cho u mir sy geng ab Bärn zäme im Zug ghocket. I luege se no jetz als Fründin aa. Es sy no happigi zwöi Jahr gsy. Mit myre vierte Rügge OP und em jährige Morphium Entzug. I ha mir la säge, dass es hüüfig so isch, dass si byr Bruefsprüefig Lüt löh la düregheie wo d'Schuel vor IV zahlt worden isch. Ja, u das isch mir o so passiert. (klar tuen ig da öppis bhoupte wo völlig subjektiv isch...)
I ha mir druf abe by re Psychiatere gmäldet wüu ig total a mir zwiflet ha. Si het mi zu re Lern Coachin gschickt. I ha du es Jahr später nume no der schriftlech Teil vor Prüefig müesse wiederhole u ha, voller Stolz chönne a der Diplomfyyr der eidgenössisch Fähigkeitsuswys vor Sozialbegleitig übercho. Der Verein Mosaik het mi du chönne als SoBe aastelle. Wenn öpper myni Diplomarbeit wott läse, chasch Di bi mir mälde...