I ha im Saal vor BewegigPlus, denn no ar Emmentalstrass 73, aagfange aube am ne Mittwuchnami d'Lüt vom Durchgangszäntrum yyz'lade wo näberdaa gwohnt hei. I ha ghört gha, dass en Ägypter mit sym Yfer s'Zäntrum drunder u drüber machi. Är sygi phänomenal im Computer flicke, verzelli aber jedem vo Jesus. I ha o vernoh, dass syni Frou u Töchtere gly o is Zäntrum chömi. Wo si du cho sy, bin ig a ihri Zimmertüür go chlopfe. D'Irena het mir uftah u isch sofort begeisteret gsy use z'chönne. Si het sech samt ihrer Töchtere gar nid wohl gfüehlt im Camp, i däm chlyne Zimmer. Si sy koptischi Christe u sy vo Ägypte här wäg de Muslimbrüeder i d'Schwytz gflohe.
Si het sehr schnäll Dütsch glernt u redt ihri Muettersprach Ukrainisch, vor Schuel här Russisch, vom Studium här Englisch u vo Ägypte här, Arabisch. Si isch o gly is ikut cho u het sofort afa mithälfe. I bi sooo froh um si, no Hüt i beidne Träffs.